Remaung6renjer

Nuffnang

Sunday, April 14, 2013

Pilihan Raya Umum Ke-13 (PRU13) - Bakani Ka Narit Undi Iban-Dayak Bagi Ke-1

Sunday, 14th April 2013
Kuantan, Pahang


Kitai Iban-Dayak Mesti Berani Ngelaban Raja Sarawak Tu!
Enti ka boleh sokong ari orang Rumah Panjai, orang ti kempen ke parti PR mesti oleh convince orang rumah panjai Lalu nunjuk ke tanda tu ngagai orang BN.


Kitai Iban tauka bansa Dayak ke bukai patut ia baka maia ke diatu udah nemu diri dikelinyai perintah Barisan Nasional. Kitai ukai semina tinggal ari pemansang menoa, pelajar tauka penatai pemisi tang utai ti pemadau berega tauka pengaya ba kitai ianya tanah kitai baka tanah pemuda serta tanah ti endor kitai berumah pan abis dirampas perintah Taib Mahmud. Nya alai enti kitai enggai agi diperinsa perintah BN maia pengawa bepilih ke sekali tu meh kitai muai sida. Nya alai aram kitai kelebih agi bala Iban-Dayak ti diau di Sarawak ngerembai ke utai ti ditulis aku tu ngagai bala aki-inek, apai-indai,bala menyadi serta kaban ti diau di menoa pesisir awak ke menoa kitai Sarawak ke sekali tu dipegai parti Pakatan Rakyat (PR).
 
Baka ke selama tiap-tiap hari maia pulai bekerja aku selalu bejako dalam talipaun enggau indai aku nanya ke berita serta pengerai ia. Dua-tiga ari ke lepas aku bisi limpang mimit nanya ia pasal pengawa bepilih di menua kami di Empaling, Sg Tenggang. Utai ti ditanya aku nya pasal pengawa kempen oleh parti-parti BN tauka PR serta enggau tunga sokong orang menua kami. Baka pilihanraya ke udah mega nitih ke padah indai aku nadai bisi orang udah kempen ngagai menoa kami baik ari BN tauka PR. Pia mega ari segi sokong, nitih ke padah indai aku orang di menua kami endang rata-rata sigi agi nyukong "Perintah". Nya alai enti baka PR ka bulih sukong ari bala ke diau di rumah panjai dua perkara tu mesti diperati ka ianya pengawa kempen serta bakani ko kitai ka ngakis mentaliti "BN=Perintah" ari orang ke diau di rumah panjai.
 
Orang Iban-Dayak Sanggup diau ba rumah panjai ti baka tu ari ti ngelaban "Perintah " BN!

Pengawa kempen ngagai rumah panjai mesti di atur enggau manah serta "logistic support" baka Public Address (PA) system mesti cukup. Enti kempen semina nganjong batang tuboh aja nama guna. Anang ngumbai orang rumah panjai nadai "first impression" leboh ti meda penatai orang ti kempen. Ari pengawa kempen ke bisi dipejalai ke bala kami maia pilihanraya DUN Sarawak 2011 tu tadi aku meda kempen ti dipejalai ke nadai bisi sistematik serta logistic support ti cukop. Bala sida PA, power supply tauka generator pan nadai bisi. Uji kitai empu nyadi penerima bala kempen ti baka kami sebuat nya tadi nama first impression kita? Setuju. Kita mesti nadai bisi confident meda bala ke datai kempen. Enti udah kempen pan nadai digaga enggau manah bakani ko bala orang rumah panjai deka ngundi kitai. Nya alai baka ngenang pengawa kempen kami nyin tadi maioh orang datai ngulu tang maia bepilih semina 2 tauka 3 iko aja ti bisi ngundi pengari kami.
Pia mega siti agi utai ti beguna amai maia kempen ngagai rumah panjai tu strategi. Baka ngenang pengawa kempen  kami sebuat nyin tadi, nadai bisi strategi. Utai ti deka dikejako ke tak nitih ke utai ti bisi dalam ontak lalu sebarang pansut aja. Sepatut ia bala ti kempen mesti bisi udah besedia ari segi isu tauka utai ti deka dipansut ke. Enti baka orang ti sepatut ia nyadi ke cunto kempen, aku berasai rindu meda cara menyadi kitai ari Parti Democratic Action Party (DAP) berkempen. Sapa-sapa ti kala nitih ke ceramah parti DAP tu mesti besetuju enggau aku. Parti DAP tiap-tiap ceramah sida utai ti pemadu manahnya ari segi   logistic Support sida. Sida deka beguna ke PA serta stage ti manah siap enggau projector. Pia mega baka isu tauka buah jako ti dipantai ke sida tau narit bala pengundi. Nama kebuah kitai Iban-Dayak enda oleh nitih ke penemu DAP ari segi bekempen?
Peda Gaya orang DAP berkempen. Uji kita bekempen ngagai rumah panjai bakatu!
 
Pekara ke-dua ti deka dipansut ke aku ke  sekali tu ianya pasal orang rumah panjai ti nganggap BN tu tadi perintah. Sekali pandang ko orang Laut kitai selalu nyalah orang rumah panjai taja pan nemu diri dikelinyai ke BN tang agi mega deka ngundi BN. Di menoa endor aku bekerja ditu pan orang masih nganggap orang "Sarawak bodoh" laban ti nyadi kubu-kuat BN tajapan ari segi pemansang Sarawak jauh tinggal. Tang enti kitai meda ke belakang sokong kitai Iban-Dayak, dia kitai deka nemu Iban-Dayak tu ari segi politik endang kuat. Tang kitai Iban-Dayak majak lemi ari segi politik udah Insiden Ming Court dititih ke PBDS masuk BN serta pengujung parti PBDS tu ditutup. Maia PBDS agi kuat ngari ke kitai Iban-Dayak, kitai Iban di rumah panjai endang sigi kuat amai nyukong PBDS laban parti tu endang ngering ke kitai Iban-Dayak. Maia PBDS agi nyadi pembangkang di peringkat DUN lalu enggau BN di Parlimen, Taib Mahmud nadai berani negu tanah kitai Iban-Dayak. Lalu kitai Iban-Dayak semakin lemi dalam politik udah PBDS masuk BN. Lalu pia mega maia PBDS agi nyadi pembangkang rumah panjai kitai Iban diukum Taib nadai diberi pemansang. Nya alai maia tu maioh amai rumah panjai kitai Iban putus. Uji kitai meda menoa ke sebelah tisi jalai ti maioh putus semua ia ketegal PBDS ti nyadi pembangkang lalu masuk dalam BN baru. Nya alai kitai Iban ti diau di rumah panjai sampai ke diatu agi fobia nadai diberi pemansang oleh Taib Mahmud serta takut nadai ngundi "parti perintah" BN. Taja sida ngundi BN tang ukai nya reti iya sida rindu ke BN. Nya alai enti baka PR deka menang undi orang rumah panjai, maia kempen mesti kempen betul-betul, cukup sedia ari segi "logistic support" serta isu ti deka dipansut ke. Ngena simpati baka jako madah ke PR nadai duit tauka ngumpul derma ari orang maioh engka efektif di nengeri (bandar)  tang enti kempen ngagai rumah panjai strategi tu nadai tau dikena. Sapa-sapa ti kempen ngagai rumah panjai mesti oleh "convince" orang rumah panjai sida ia cukup duit serta utai bukai dikena niri ke perintah. Enti PR deka berdiri di tempat-tempat majoriti Iban-Dayak sida mesti bersedia ari segi "logistic Support". strategi serta  duit. Enti nadai ketiga-tiga utai tu tadi, manah agi PR anang ngelaban terus laban enti nadai cukup besedia tu deka nambah ke pengerosak politik orang Iban-Dayak.
Lalu naka tu dulu buah karang aku ke sekali tu. Ba bagi ti deka datai akau deka nyebut isu ti tau dikena PR kena kempen ngelaban BN di rumah panjai.

Mupok Aku


 

Comments :

2 comments to “ Pilihan Raya Umum Ke-13 (PRU13) - Bakani Ka Narit Undi Iban-Dayak Bagi Ke-1 ”
Anonymous said...
on  
P

Manah amat penemu nuan unggal Remaung. ngarap ke parti PR ti deka berdiri Di menua tu Oleh mansik ke penemu nn serta Oleh narit sukong orang menoa pesisir....idup PR titi
Rimau Pantu

Anonymous said...
on  
P

Heya just wanted to give you a brief heads up and let you know a few of the images
aren't loading correctly. I'm not sure why but I think its a linking issue.
I've tried it in two different internet browsers and both show the same results.

My blog: travel

Post a Comment

Post a Comment

Blog Widget by LinkWithin

Chitika

BlogTopsites

Politics Blogs - Blog Top Sites

MyBlogLog

Google Rank

Alexa Ranking

Technorati

BlogSearch Engine

BlogRanking

Politics Blogs - Blog Rankings