Remaung6renjer

Nuffnang

Tuesday, March 29, 2011

SNAP enggau PKR Anang Belaya

Kuching
Tuesday, 29th March 2011


Enti ke-empat Parti tu Oleh Begempung, Kena 17 April 2011, Petra Jaya deka nyadi empu PR


Orang Iban ti diau di rumah panjai lalu berumur dalam kandang 50 tahun ke atas,  runding sida udah diracun Barisan Nasional enggau pemansang ti jampat di peda baka pemeri atap sing, duit RM5000 enggau pemansang bukai ti oleh peda kemaianya. Sida nadai berunding ke diri ti udah ditipu Barisan Nasional sepemanjai 47 taun sida iya ke udah kena pegai perintah Barisan Nasional.
Nya alai ngagai bala Iban ti bisi pemandai mimit serta bisi meda reti pemansang ke bendar, mansang kita  madah ngagai orang rumah panjai awak ke mata sida meda serta pending sida ninga reti pemansang ke bendar. Bala Iban dalam parti SNAP enggau PKR badu becerakah agi....tetap ke runding. Munsuh kitai ke bendarnya orang Barisan Nasional..aram kitai ngerencah sida!

Nama Kebuah Bansa Iban Bisi Buya Enggau PKR

Terubah PKR masuk pengawa politik menua Sarawak, maianya kita Iban agi tekial-kial nadai parti politik enggau bepanggai laban Parti Bansa Dayak Sarawak (PBDS) ti udah dirumpang ROS ketegal krisis ti di gaga Jemut Masing. Lalu maianya mega ROS lalu bedau ngemendar ke Malaysian Dayak Congress (MDC) tauka Kongres Dayak Malaysia ari ti diregista.
Lalu maia bepilih besai ti ke-12 dalam taun 2008 maioh bala Iban ti bisi pemandai berdiri ngena lambang parti SNAP enggau PKR. Udah pengawa bepilih besainya tadi lalu nyau ka semua bala Iban ti agi nganti MDC diregista masuk parti PKR.
Taun 2008 ngagai pun taun 2010 nya maia bla Iban ti kuat bepegai ba parti PKR. Tang sukong Iban mula berubah ari parti PKR ngagai SNAP dalam kandang ujung taun 2010. Sokong bala dayak mula berubah ngagai SNAP udah ia ti menang becara ngelaban ROS ba  "Court of Appeal" kena 24 Jun 2010. Lalu sokong bala dayak ngagai SNAP mula betambah kuat sekuat udah bala Iban baka sida Paul Kadang serta bala ke bukai masuk SNAP.
Nyadi ba runding bala Iban SNAP tu parti ungkup orang dayak laban keterubah di Sarawak, PAS ngari ke Melayu, DAP ungkop orang bansa Cina, PKR manah ke orang Melayu enggau Melanau serta SNAP ari keterubah ti ditumboh dalam taun 1971 ngagai diatu  endang ngari ke orang Iban/Dayak.
Kedua, Sarawak endang patut diperintah Dayak/Iban. DAP merintah Pulau Pinang, PAS merintah Kedah enggau Kelantan lalu PKR megai Selangor. Nya alai endang patut SNAP megai Sarawak. Lalu pia mega enggai nyadi bansa dayak minoriti ti di ari ke oleh Baru Bian nyadi Kepala Menteri Sarawak..nya alai endang patut orang Iban/Dayak masuk SNAP.
Taja orang Iban milih parti SNAP tang enda semesti iya SNAP nyarak diri ari Pakatan Rakyat (PR). SNAP mesti setanah enggau PR.
Nya alai enti PR deka nendang BN ari ti megai menua Sarawak, semua parti dalam PR ianya PAS, PKR, DAP enggau SNAP mesti begempong ati...

PKR enggau SNAP Besaup Ngerembai Ke Penemu PR ngagai Rumah Panjai.

Sepengelama lebih kurang 47 udah dipegai BN, penemu Iban di rumah panjai endang sigi jauh di belakang. Leboh maia tuan Hj Hadi ti madah ke penemu kitai Iban penemu ti agi ngena sirat aku endang sigi besetuju amai enggau iya. Ukai ga rindu ninga orang ngelesei ke bansa diri tang enti kita berunding enggau dalam dia kitai deka besetuju enggau Tuan Hj Hadi. Ketegal pia laban kitai Iban empu penemu endang agi jauh tinggal di belakang.
Lalu baka orang ti patut dipesalah kitainya endang BN laban ti enggai ngemaju ke kitai Iban/Dayak. Ari ti di perati aku kebuah sida BN enggai ngemaju ke bansa kitai Iban laban enti kitai Iban nyadi pandai enggau kaya magang dia kita deka nadai beguna ke BN lalu enggai nyukong tauka ngundi sida agi.
Aku nguji bejalai ke pengawa kempen ngagai bala apai-indai serta bala menyadi ngasoh sida anang ngundi BN maia pengawa bepilih ti deka datai, lalu tu ku saut sida:-
"Kitai ni tau lari ari perintah laban semua pemansang, subsidi serta nembiak ti sekula enti nadai perintah sapa ti meri? " Pia ko jako sida.
Lalu pia mega leboh ti nguji nanya penemu tuai rumah lalu ngansak sida ngundi SNAP enggau PKR dia deh sida nimbal jako kitai bakatu :-
"Enti nadai ngundi perintah sapa ti deka ngaji kami RM 400 sebulan? Oleh SNAP tauka PKR ngaji kami?" Pia ko jako tuai rumah matah ke jako kitai. 
Ari leka jako ti dipantai ke bala orang rumah panjai serta tuai rumahnya tadi dia kitai deka meda runding orang rumah panjai endang udah dipesong ka oleh BN. Jako ti endang selalu dikena sidanya "BN = Perintah lalu Perintah =BN". Nya alai enti PR deka menang di tempat ti majoriti Iban, kitai mesti nemu bakani ko matah ke jako serta pikir orang rumah panjai serta tuai rumah ti nganggap BN tu Perintah! Anang empelita ukai nyamai ka matah ke penemu orang rumah panjai ti udah dipesongka BN sepengelama 47 taun sida megai menua Sarawak.
Ngagai bala PKR tauka SNAP, badu bekelikoh manah agi berunding, berandau lalu patah ke penemu salah orang rumah panjai ti madah ke BN nya Perintah. Pia mega aku deka ngingat ke PKR tauka SNAP, pengawa tu nadai nyamai tang enti kedua-dua parti tu mupuk bekerja berimbai sejalai, aku pecaya maia 17 April 2011 ti ka datai tu dia kitai deka meda PR megai Sarawak. Lalu enti kitai deka meda Sarawak nyadi menua ti keterubah endor PR ngena Buku Jingga, ngagai PKR enggau SNAP berenti bejako lalu mula bekerja diatu.

Mupok Aku


+

Comments :

1
Anonymous said...
on  
P

The Ibans will never be united as one entity.As long as we have brains to think we think differently so thus we differ in our values.BUT we can agree on SOMEthing.PKR is a peninsula-based party.Not all Dayaks/ibans support it eventho they're anti-BN.
The opposition parties can never win the forthcoming election.

Post a Comment

Post a Comment

Blog Widget by LinkWithin

Chitika

BlogTopsites

Politics Blogs - Blog Top Sites

MyBlogLog

Google Rank

Alexa Ranking

Technorati

BlogSearch Engine

BlogRanking

Politics Blogs - Blog Rankings